Psa 7 | NdeIBE | STEP | Ishigayoni kaDavida ayihlabelela uJehova mayelana loKhushi umBhenjamini. O Jehova Nkulunkulu wami, ngiphephela kuwe; ngisindisa ungikhulule kubo bonke abangizingelayo,

Psalms 7

1 O Jehova Nkulunkulu wami, ngiphephela kuwe; ngisindisa ungikhulule kubo bonke abangizingelayo,

2 ngoba bazanginithiza njengesilwane bangiklebule iziqanyana kungekho ongangilamulela.

3 O Jehova, Nkulunkulu wami, uma ngikwenzile lokhu izandla zami zilecala,

4 uma ngenze okubi kulowo ohlalisene kuhle lami loba ngisuke ngaphanga isitha sami kungelasizatho –

5 nxa kunjalo akuthi isitha sami singihlasele; masigxobagxobele impilo yami emhlabathini singibhuqabhuqe phansi ebhuqwini.

6 Vuka, O Jehova, ngolaka lwakho; vuka uvimbele ukuthukuthela kwezitha zami. Vuka, Nkulunkulu wami, memezela ukwahlulela okuhle.

7 Akuthi abantu bebuthene bakuhanqe. Busa phezu kwabo usekuphakameni;

8 uJehova kehlulele bonke abantu. Ngahlulele, O Jehova ngokwanele ukulunga kwami, ngokwanele ubuqotho bami, wena oPhezukonke.

9 O Nkulunkulu olungileyo, ohlolisisa imicabango lezinhliziyo, qeda udlakela lwababi ukuze abalungileyo bavikeleke.

10 Isihlangu sami nguNkulunkulu oPhezukonke, osindisa abaqotho ngenhliziyo.

11 UNkulunkulu ngumahluleli olungileyo, uNkulunkulu obonisa ulaka lwakhe izinsuku zonke.

12 Uma umuntu engadeli ububi bakhe uzalola inkemba yakhe; uzaligoba alithiye idandili lakhe.

13 Usezilungisile izikhali zakhe ezibulalayo; uselungisa imitshoko yakhe evutha umlilo.

14 Lowo osuthiswe ngobubi akhulelwe yikona uzala ukuphumputheka.

15 Lowo omba umgodi awuphande uwela kulowomgodi awumbileyo.

16 Inkathazo ayidalileyo iyamphendukela; lesihluku sakhe sehlela phezu kwekhanda lakhe.

17 Ngizambonga uJehova ngenxa yokulunga kwakhe; ngizahlabelela indumiso egameni likaJehova oPhezukonke.